|
Porthmadog - Y Lle I Aros
Croeso i Borthmadog (neu ‘Port’ fel y’i gelwir yn lleol) canolfan
lle y gallwch grwydro Eryri: mae’n borth i Barc Cenedlaethol
prydferthaf y wlad, yn 840 milltir sgwâr gyda’i mynyddoedd
porffor a’i fforestydd.
Mae Porthmadog hefyd yn dref fyrlymus, yn llawn siopau a
llefydd bwyta. Mae ganddi dreftadaeth gref a balch, diwylliant
a chymuned. Mae’r iaith Gymraeg, sy’n cael ei siarad yn
gyffredin yma, yn rhan hanfodol o’i hunaniaeth, ac mae’r
bobl yn hynod gyfeillgar.
Mae eich holl anghenion gwyliau ar gael o fewn tafliad carreg.
Mae dilynwyr y rheilffordd stêm wrth eu boddau yma! Mae
Rheilffordd Ffestiniog a Rheilffordd Ucheldir Cymru yn eich
annog i gamu yn ôl mewn amser a rhoi naid ar drên y naill
ben i’r dref, i fwynhau golygfeydd y mynyddoedd a siarad yn
ddi-ben-draw am y dyddiau a fu.
O ba bynnag gyfeiriad y dewch i Borthmadog, ni all y
golygfeydd godidog beidio â gwneud argraff arnoch. Caiff ei
dominyddu ar un ochr gan fynydd Moel y Gest sy’n 262 medr
uwchlaw’r dref. I’r gogledd a’r dwyrain mae ehangder aber
yr afon Glaslyn, sy’n enwog fel hafan adar ymfudol a bywyd
gwyllt, yn ymestyn yn ddramatig tuag at yr Wyddfa.
Wrth drafaelio o’r de, byddwch yn cyrraedd y dref ar hyd
y Cob enwog. Fe’i adeiladwyd i ffurfio’r harbwr ble byddai
llongau hwylio yn cario llechi wedi eu cloddio ym Mlaenau
Ffestiniog a Chwm Croesor i bedwar ban byd. Mae’r Cob
hefyd yn llwybr i’r rheilffordd a adeiladwyd yn wreiddiol i
gludo llechi o’r chwareli i’r harbwr.
Yn y porthladd hwn a fu mor fawr yn ei amser, a’i hanes
morwrol cyfoethog, rydych wedi eich lleoli mewn man
delfrydol ar gyfer ymweld â’r holl brif atyniadau yn yr ardal.
Gyda holl fawredd Eryri yn y cefndir ac arfordir a thraethau heb eu hail, does unman mwy deniadol i dreulio eich gwyliau.
|
